Акафист Корсунской Божией Матери
(Коррекция от 2025 года)
↓↓↓ СКАЧАТЬ ↓↓↓
АКАФИСТ КОРСУНСКОЙ БОЖИЕЙ МАТЕРИ
↑↑↑ СКАЧАТЬ ↑↑↑
Икона явлена во граде Усмани Липецкой епархии. Праздование «Корсунской» иконе Пресвятой Богородицы –22 октября.
Земли нашей Заступнице песнь хвалебную воспоим, яко града Усмани, Покрове еси и Надеждо, наша преизряднейшая. Никогда же молений усердных не отвергающая, но вся ко благу просящим туне дарующая. Сего ради чудотворную Твою сию икону зряще, якоже Самей Ти зде предстоящей, благодарне недостойные раби Твои со умилением вопием Ти:
Радуйся, Пречистая, града Усмани похвало и утверждение.
Тропарь 1, глас 4
Заступнице усердная/ град Усмань, милостию посетившая,/ выну покров Твой над нами простираеши,/ за раб Твоих Сына Твоего умоляюще,/ кладезь чудес неисчерпаемых явилася еси;/ неисчетные благодеяния иконою Твоею источающе,/ немощных врачуеши,/ от глада и пагубы избавляеши,/ семьи православные устрояеши,/ наипаче же присно твориши спастися нам.
Кондак 1
Земли нашей Заступнице песнь хвалебную воспоим, яко града Усмани, Покрове еси и Надеждо, наша преизряднейшая. Никогда же молений усердных не отвергающая, но вся ко благу просящим туне дарующая. Сего ради чудотворную Твою сию икону зряще, якоже Самей Ти зде предстоящей, благодарне недостойные раби Твои со умилением вопием Ти:
Радуйся, Пречистая, града Усмани похвало и утверждение.
Икос 1
Ангелов Творец и веков Содетель избра Тя, Пречистая, ради смирения и веры сердца Твоего в драгоценнейший сосуд благодати Духа Святаго, да Материю Света соделаешися, чаяния Ветхаго Завета исполняя, кротким речением: «Буди Ми по глаголу твоему», Творца в мир низведеши. Тварь же вся, величию твоему ужасаяся, вопиет Ти: Радуйся, Мати Господа Вышняго; Радуйся, паче всех жен благословенная. Радуйся, Творца всех недоуменно рождшая; Радуйся, спасение тем миру возвестившая. Радуйся, паче Херувим и Серафим возвеличенная; Радуйся, рабой Господней Себя именовавшая. Радуйся, не единою мыслию Тому не погрешившая; Радуйся, присно душею девственной Бога величавшая. Радуйся, семенем Твоим главу змиеву сокрушившая; Радуйся, неисчетных рождеством Твоим спасшая. Радуйся, возвеличенная Госпоже мира горнего; Радуйся, Мати сердобольная мира дольнего.
Радуйся, Пречистая, града Усмани похвало и утверждение.
Кондак 2
Залогом милости Божией и возлюбленной Его Матери даровася икона Твоя Корсунская, во граде Усмани чудно явленная, да от бед и напастей прибегающих к ней оградиши и благодатию землю нашу покрыеши, да люди, видяще благодеяний множество, чрез икону Твою честную изливающися, благодарственно воспоют Богу:
Аллилуйя.
Икос 2
Матери о несчастии дщери скорбящей, чад всех мертвыми рождавшия, явилася еси, Владычице, в видении соннем, повелевая во град Усмань отыти, Корсунской иконе Твоей помолитися, образ сей ей же во сне показаша, да дщерь ея исцелеет. О таковом благоволении Твоем к страждущим дивяшеся, с любовию воспеваем Ти сице:
Радуйся, Госпоже Ангелов; Радуйся, всех святых большая. Радуйся, райская двере отверстая; Радуйся, лествице Царствия Небеснаго. Радуйся, Царя Славы прекрасный чертоже; Радуйся, неистленный ковчеже благодати. Радуйся, безпомощных Заступнице; Радуйся, бездно щедрот и милости. Радуйся, прибежище грешных и скорбных; Радуйся, Мати Спасителя Христа. Радуйся, яко Ты одесную Бога стоиши; Радуйся, яко Его за нас умоляеши.
Радуйся, Пречистая, града Усмани похвало и утверждение.
Кондак 3
Мать благочестивая, указание Твое получивше, в собор Усманский со дщерью поспешиша, просяще икону сию им указати, ответ же неутешен в неимении тоя получивше, просиша неотступно, усерднее образ сей, самой Царицей Небесной показанный, искати. Веру непоколебимую в истинность словес Ея показуя, Богу же поя:
Аллилуйя.
Икос 3
Радости неизреченныя сердце жены боголюбивой исполнися, егда икону, в сновидении виденную, среди других обретеша. Она же тую в Воронеж испросиша, ризою многоценною украсить ея хотяще, моления слезные излить пред нею, да дщерь ея благополучно разрешится. Мы же умилением от таковой любве к Тебе исполняемии, воспеваем Ти похвальная:
Радуйся, икону сию Сама явившая; Радуйся, цветок сей райский во граде нашем насадившая. Радуйся, многия чудеса ею явившая; Радуйся, веры яже в Тя, не посрамившая. Радуйся, яко Ты еси слава горнему и дольнему Иерусалиму; Радуйся, прещедрая милости Мати. Радуйся, верных прибежище; Радуйся, избавление в лютых содержимым. Радуйся, источниче благостыни; Радуйся, небесная доброто чистоты. Радуйся, свете правды, милости и истины; Радуйся, любящим Тя неотъемлемое сокровище.
Радуйся, Пречистая, града Усмани похвало и утверждение.
Кондак 4
Милость велию Царица Небесная женам богобоязненным послаша, горе в радость преложивше, дитя долгожданное даровавше, да и вси видяще чудо таковое, чрез икону Твою явленное, радости матери срадующеся, воспоют Богу:
Аллилуйя.
Икос 4
Благодарне сущий за таковое от Богоматери посещение, с честию икону Твою чудотворную в киоте, ризою с венцом обложенную в Усмань по прошествии года возвратиша. Икона же сия чудесы, яко крин райский, процветшая, подвизает верных по вся дни хвалити Тя:
Радуйся, матерь скорбную утешившая; Радуйся, дщерь ей даровавшая. Радуйся, болезнь ея тяжкую разрешившая; Радуйся, во граде Воронеже многим благодать пославшая. Радуйся, чудеса почитающим образ сей источающая; Радуйся, вся просимое пред нею во благо дарующая. Радуйся, христианских семей хранительнице; Радуйся, чревоносящих жен покровительнице. Радуйся, не хотящих имети детей обличительнице; Радуйся, сиротствующих попечительнице. Радуйся, звездо во граде Усмани присносияющая; Радуйся, молящихся Тебе державным покровом осеняющая.
Радуйся, Пречистая, града Усмани похвало и утверждение.
Кондак 5
Угодно Матери Божией быша, почитание чудотворной иконы усманской во граде Воронеже начата, откуду оная, яко звезда светящая, в собор возвратившись, для утешения и просвещения христианскаго жителям усманским воссияша, те же радостно пели Богу:
Аллилуйя.
Икос 5
Множество народа с радостию велию Покровительницу свою встречаше, песньми молебными Ея ублажающе, здравия недужным, скорбей отчуждения, в семьях мира водворения просяще. И поныне святая икона Твоя море милости изливает. Тем же пение Тебе приносим сице, о преславном образе Твоем веселяшеся:
Радуйся, в землю усманскую возвратившаяся; Радуйся, небрежение к иконе Твоей простившая. Радуйся, святителем Митрофаном за нас умоленная; Радуйся, таковой нам дати дар изволившая. Радуйся, образ сей на радость Усмани прославившая; Радуйся, не единожды от бед град наш и веси избавльшая. Радуйся, Царице, паче солнца светлейшая; Радуйся, Владычице, паче звезд блистающая. Радуйся, паче всех аромат благовоннейшая; Радуйся, паче всякаго цвета сельнаго краснейшая. Радуйся, недремлющая наша Хранительнице; Радуйся, спасения всем верным желательнице.
Радуйся, Пречистая, града Усмани похвало и утверждение.
Кондак 6
Причет церковный противу прихожан желания, бояшеся архиереови о чудотворном образе возвестити, да в корыстолюбии укорению не подвергнутся. Тогда же сам Святитель Тихон с открытия мощей своих послаша Святителя Феофана Затворника образ новоявленный почтити. Той же о происхождении иконы сей известившись, коленопреклоненно пред нею помолившись, с любовию лобызал ю, поя Богу:
Аллилуйя.
Икос 6
Благоговейным же сим Архипастыря вниманием к чудотворной иконе Твоей, Владычице, к радости велией Твоих почитателей, открытое поклонение иконе Твоей начашеся. Зря ея же в храме на достойнем месте поставленную и с подобающими почестями украшенную, благодарением к Тебе исполняеми, прибегающие под всесильный покров Твой, пояху Тебе сице:
Радуйся, славою и красой облеченная; Радуйся, аще что просиши у возлюбленнаго Сына Твоего, скоро приемлеши. Радуйся, отчаянных надеждо благонадежная; Радуйся, помоще безпомощных скорая. Радуйся, небес Радосте; Радуйся, и земли истинное веселие. Радуйся, нетленный ковчеже от потопа греховнаго весь род человеческий спасшая; Радуйся, всех притекающих к Тебе скорое и безопасное прибежище. Радуйся, кротчайшая небесная Голубице; Радуйся, предражайший небесный Маргарите. Радуйся, Жизне жизни нашея; Радуйся, Свете Небесным светом осиянная.
Радуйся, Пречистая, града Усмани похвало и утверждение.
Кондак 7
Многочисленностью собравшихся на торжество освящения придела в честь иконы Твоея Корсунской, благоговение богомольцев ко святому образу Твоему Богомати явишеся, егда множество народа с окрестностей усманских, собрашеся едиными усты и единым сердцем пети Богу:
Аллилуйя.
Икос 7
Усердием к Царице Небесней подвигаеми, помимо праздника Ея престольнаго, каждонедельно молебен с акафистом и водосвятием пред чтимым образом Ея совершати положили, на тойжде тысящами верующие стекалися, свещи держа заженными, дабы молитва церковная, якоже фимиам кадильный исправна бяше, како жертва вечерняя сердец, любовию к Матери Божией пламенеющих и поющих Ей с надеждою:
Радуйся, всех христиан недуги исцеляющая; Радуйся, от бед многократно избавляющая. Радуйся, слепым очи отверзающая; Радуйся, расслабленных воздвизающая. Радуйся, превыше сил небесных возвеличенная; Радуйся, в ризах позлащенных одесную Бога стоиши. Радуйся, Его за нас умоляющая; Радуйся, Врата Жизни вечныя. Радуйся, чистейшее Духа Святаго приятелище. Радуйся, непорочное Слова Божия святилище. Радуйся, яко Тобою спасение миру возвещается; Радуйся, яко Тобою падший человек возставляется.
Радуйся, Пречистая, града Усмани похвало и утверждение.
Кондак 8
Праздник Твой престольный торжеством во весь год жданный сташе. Тако в землях усманских икону Твою возлюбиша, что и учащиеся в той день от учения освобождалися, да возмогут Тебе, Владычице, пред иконою Твоею чудотворною, молитвы вознести смиренныя и в торжестве общем соучастниками быти, поя Богу:
Аллилуйя.
Икос 8
Множество народа не токмо с весей окрестных, но и из дальних земель на праздник Твой и на пение акафистное собиралося, в силу предстательства Твоего пред Престолом Вседержителя веруя, так что церковь полна бяше молящимися, в простоте сердца Тебе возглашающих:
Радуйся, кристалловидный источниче, небесными сладостями исполненный; Радуйся, мысленное небо, души и сердца увеселяющее. Радуйся, помощнице сокрушенных сердцем; Радуйся, Божия благодати ходатаице. Радуйся, противу адскаго врага столпе крепчайший; Радуйся, моря мира сего благоотишное пристанище. Радуйся, сердца любовию к Богу исполняющая; Радуйся, всеми добродетелями украшенная. Радуйся, всякую горесть услаждающая; Радуйся, церковное незаходимое и лучезарное светило. Радуйся, небесный свете благочестивых; Радуйся, милосердно наказующая нечестивых.
Радуйся, Пречистая, града Усмани похвало и утверждение.
Кондак 9
По уседному прихожан прошению икону святую благослови Преосвященный Феодосий по домам верующих пущати, желающим молебен пред нею служити. Икона же Твоя Богородительнице, в домы вносимая, лютыя болезни исцеляша, к покаянию вразумляша, мир в семьях водворяша, подвизая пети всех:
Аллилуйя.
Икос 9
Святую икону Твою невредимо сохранила еси, Владычице, егда святотатца, образ Твой украсть покусившагося, страх объяше смертный, тако в нем во всю нощь пребывающе, не могоше обратно в пролом влезти, под святым престолом найден быша. Мнозии же сие зряще, от представления толикаго ужаснаго, рыдаху горце. Тебе же Царице, греху страшному быти не попустившей, воспели сице:
Радуйся, икону Твою целу сохранившая; Радуйся, татя страхом устрашившая. Радуйся, благодать Твою от града не отъявшая; Радуйся, во всем Промысл Божий видеть научающая. Радуйся, неложная наша Покровительнице; Радуйся, мрак беззаконий рассеявающая. Радуйся, неверующих в присный Твой покров обличившая; Радуйся, слезы на радость преложившая. Радуйся, милости источниче; Радуйся, мирови прибежище. Радуйся, красото небесная; Радуйся, святых всех радосте.
Радуйся, Пречистая, града Усмани похвало и утверждение.
Кондак 10
Аки луч светлая бысть икона Твоя честная, мрак неведения разгоняющи, души окаменелые просвещающе, к благодеяниям бедствующим подвигающе. Тако по единому пастыря воззванию, ради Заступницы усердной, в чтимом образе яве зримой, жертвы мнозии братии нуждающейся приношаху, да и тии воспоют Богу:
Аллилуйя.
Икос 10
Гнев Божий града нашего достигнул, егда холера к пределам усманским подступиша. Взоры же всех тогда к пречудному образу Твоему обратилися, яко к надежде последней и стене необоримой. Ты же скорая Помощнице не напрасно именуемая, чаяний, яже к Тебе не посрамила еси и болезнь лютую вскоре укротила еси. Тем же приими пение похвальное:
Радуйся, все дома во граде посетившая; Радуйся, безчисленных исцелившая. Радуйся, Сына Твоего на милость преклонившая; Радуйся, страхом одержимых не отринувшая. Радуйся, спасение немощных; Радуйся, утешение озлобленных. Радуйся, от бед смертных изводящая; Радуйся, от руки врага и злаго местника избавляющая. Радуйся, стези заблудших к Богу направляеши; Радуйся, неистощимо благодатныя дары изливаеши. Радуйся, язвы греховныя врачуеши; Радуйся, в радость вечную внити сподобляеши.
Радуйся, Пречистая, града Усмани похвало и утверждение.
Кондак 11
Умиления вси исполнилися, о Твоем Мати Божия быстром заступлении, яко по молитвам любящих Тя, скоро Сына Твоего на милость преклоняеши, да прошения Твоя за род человеческий исполнит. Ему же сущи благодарнии поем выну:
Аллилуйя.
Икос 11
Чудо о Тебе в Усмани бывшее зряще, и в окрестных селениях икону Твою видети в пределах своих желанием мнозии вожделеша. Ты же с крестным ходом в Демшинск на помощь страждущим шествовшая, знамение видимое милости Твоея явила еси, егда к веси в сумерках приближающихся, свет небесный осияше. Те же радостию о сем знамении исполнившеся, воспеша Тебе сице:
Радуйся, светом молящихся осиявшая; Радуйся, благоволение к ним сим показавшая. Радуйся, веру их укрепившая; Радуйся, чудом тем о пребывании Твоем близ них известившая. Радуйся, отчаянием обуреваемых возвеселившая; Радуйся, знамение милости Твоея к усердствующим явившая. Радуйся, холеру в веси той прекратившая; Радуйся, болящих от нее исцелившая. Радуйся, между Богом и человеки ходатаице; Радуйся, яко небо и земля Твоим благословенным плодом примирены. Радуйся, яко Тя вси роди ублажают; Радуйся, яко о преславном имени Твоем вси вернии торжествуют.
Радуйся, Пречистая, града Усмани похвало и утверждение.
Кондак 12
Во дни лихолетья безбожнаго отъял разум Господь у людей русских, так что и собор, икону Твою чудотворную хранящий, разрушен бысть безумными. Ты же, как во дни гонений Иродова, икону Свою от поругания сокрыша, ибо во дни тии лишь малая толика верных, мучений земных не страшася, пела Богу:
Аллилуйя.
Икос 12
Милость Свою Матери Божией угодно было явити, егда собор, в коем икона Корсунская обреталася, воздвизатися заново наченша. Накануне крестнаго хода в честь царственных страстотерпцев явися и образ чудотворный, утерянным дотоле безвозвратно считавшийся. Мы же в том знамение велие зряще, вопием Ти сице:
Радуйся, поругания иконы не допустившая; Радуйся, тую под спудом времени благоприятна сокрывшая. Радуйся, за разрушение святынь благодать отъявшая; Радуйся, ради избранных за покаяние ее возвратившая. Радуйся, царственными страстотерпцами за нас умоленная; Радуйся, в канун крестнаго хода в честь них вновь обретенная. Радуйся, надежду имети собор утвердившая; Радуйся, строительство таго чудным образом благословившая. Радуйся, многая чудеса по славном обретении явившая; Радуйся, жену не могущую разрешитися исцелившая. Радуйся, младенца той противу приговора врачей цела сохранившая; Радуйся, весь град и веси возвращением иконы Твоея возвеселившая.
Радуйся, Пречистая, града Усмани похвало и утверждение.
Кондак 13
О, Всепетая Мати, надеждо наша непостыдная, обычным Твоим заступлением землю нашу покрый от соблазнов, душам нашим пошли покаяние, да Твоим милосердным предстательством, умоли Христа Вседержителя, оставленье грехов нам подати и в раю со святыми вселити, идеже выну на Тя взирая, будем пети Ему: Аллилуйя. (читается трижды)
Икос 1
Ангелов Творец и веков Содетель избра Тя, Пречистая, ради смирения и веры сердца Твоего в драгоценнейший сосуд благодати Духа Святаго, да Материю Света соделаешися, чаяния Ветхаго Завета исполняя, кротким речением: «Буди Ми по глаголу твоему», Творца в мир низведеши. Тварь же вся, величию твоему ужасаяся, вопиет Ти: Радуйся, Мати Господа Вышняго; Радуйся, паче всех жен благословенная. Радуйся, Творца всех недоуменно рождшая; Радуйся, спасение тем миру возвестившая. Радуйся, паче Херувим и Серафим возвеличенная; Радуйся, рабой Господней Себя именовавшая. Радуйся, не единою мыслию Тому не погрешившая; Радуйся, присно душею девственной Бога величавшая. Радуйся, семенем Твоим главу змиеву сокрушившая; Радуйся, неисчетных рождеством Твоим спасшая. Радуйся, возвеличенная Госпоже мира горнего; Радуйся, Мати сердобольная мира дольнего.
Радуйся, Пречистая, града Усмани похвало и утверждение.
Кондак 1
Земли нашей Заступнице песнь хвалебную воспоим, яко града Усмани, Покрове еси и Надеждо, наша преизряднейшая. Никогда же молений усердных не отвергающая, но вся ко благу просящим туне дарующая. Сего ради чудотворную Твою сию икону зряще, якоже Самей Ти зде предстоящей, благодарне недостойные раби Твои со умилением вопием Ти:
Радуйся, Пречистая, града Усмани похвало и утверждение.
МОЛИТВА БОЖИЕЙ МАТЕРИ ЧУДОТВОРНОЙ ИКОНЕ ЕЯ«КОРСУНСКОЙ».
Пресвятая Владычице наша Богородице. Вемы, яко недостойнии есмы милостей, ихже непрестанно на нас чрез чудотворную Твою икону изливаеши, ибо грехи наши превзошли главу нашу, и нет греха, его же мы не сотворили, но обаче вемы, яко не по заслугам нашим Господь нам благая дарует, но по велицей Своей милости и по всегдашнему предстательству Твоему за род человеческий, его же, яко Матерь чадолюбивая зело любиши. Тем же верою в любовь Твою подвигаеми, молим Тя, не отвратися от нас грехов ради наших, но покаяние нам даруй, дабы смерть нас неготовыми не застигла. Ты же Пречистая, покрывай присно землю нашу от всяких бед и зол, да прославим Сына Твоего со Отцем и Святым Духом во веки. Аминь.